Cambios

Inkestek emandako datuetan jasotzen da etxe baten edo familia baten kategoria soziala hilobiratze-hatuetan ere islatzen zela. Herri batzuetan, familia aberatsek argimutila erabiltzen zuten argi-eskaintzetarako, eta saskitxoa familia apalagoentzat geratzen zen. Argimutila bera ere artistikoagoa eta luxuzkoagoa izaten zen familien arabera. Era berean, oihala edo zamauak egiteko erabilitako ehunak, eta zutargiak egiteko erabilitako ahokadurek, metalak eta artisau-lanak, baita belaunaulkiek ere, haien jabeen ahalmen ekonomikoaren bereizketa argia markatzen zuten.

Etxeko hilobia modu iraunkorrean elizako nabean baldin bazegoen ere, familiako emakumeek aktibatu egiten zuten etxeko bat hiltzen zenean, hala hileta elizkizunetan nola hirurrenetan, bederatziurrenetan eta ondorengo ekitaldi erlijiosoetan, lutoak irauten zuen bitartean. Aktibazioa zen hilobian argiak piztea eta hartan errespontsuak errezatzea, aurretik hatua ezarrita.