Aurkezpena
Euskal Herriko Atlas Etnografikoaren seigarren ale honetan herri medikuntza aztertu da. Lan hau egiteko bertako Etniker Taldeek giza esperientziaren eremurik berezienetarikoan datzan kultur errealitatea arakatu dute, hau da, osasuna jagoteari eta gaixotasunak sendatzeari buruz herritarrek metatu dituzten jakintzak
Europa eta mendebaldeko kulturan hainbat aldaketa bizi izan ditugu azken mende honetan, eta, hain zuzen ere, gaixotasunei aurre egiteko moduaren eta osasun zerbitzuen gaineko guztian oso nabarmena izan da aldaketa hori.
Atseginez aurkezten dudan lan etnografiko honen asmoa ez da medikuntza alternatiboa eskaintzea, ezta sendabide ezkutu edo ahaztuak berreskuratzea ere. Errezeta naturistak aurkitu nahi izango dituzte askok, baina lan hau urrunago doa: herritarrek giza gorputzari eta giza gorputzak inguruarekin duen loturari buruz izan duten pentsaera eta mentalitatea jaso gura izan dira, bai eta gaixotasun eta sendabideei buruz antzinatik datozkigun sinesmenak ere.
Euskal Herriko lurralde guztiak hartuko dituen tokian tokiko ikerketa egiteko, eskarmentu eta prestakuntza handiko ikertzaile taldeak behar dira, eta Jose Miguel Barandiaran jakintsuak sortutako Etniker Taldeek ondotxo erakutsi dute ezaugarri horiek betetzen dituztela, orain arte argitaratutako Atlas Etnografikoaren sei aleetan. Eusko Jaurlaritzak hasiera-hasieratik lagundu zion proiektu honi, izan ere, gure kultur ondarearen alderdi oso garrantzitsuak jasotzen ditu; ekarpen hau izan ezean, kultur elementu hauetarik asko denborak dakarren halabeharrezko ahanzturan galduko lirateke.
Miren Azkarate
Consejera de Cultura del Gobierno Vasco
Contenidos de la Presentación:
